Itaka- Eskolapioen sarearen 25. Urteurrena ospatzeko online topaketa bat

Joan den larunbatean, ia 250 lagunek parte hartu zuten Itaka-Eskolapioen Sarearen 25. urteurrena dela eta antolatutako online topaketa batean; ospakizunerako, eskertzarako eta eskolapioen misioarekiko partekatutako konpromisoa berritzeko gunea izan zen.

Topaketan sarearen historian eta gaur egungo errealitatean bereziki esanguratsuak izan diren hainbat lagunek hartu zuten hitza, besteak beste, Juan Alfonso Serra, Itaka-Eskolapioen Sareko egungo presidenteak; Carles Gil, Eskola Pioen Ordenako Aita Nagusiak; Javier Aguirregabiriak, sarearen hastapenetan bultzatzaile izan zenak; eta Ilona Rudkak, Anaitasunaren Kontseilu Nagusiaren ordezkari gisa. Haien hitzek 25 urte hauetan egindako bidea balioan jartzen lagundu zuten, eta, aldi berean, etorkizunari itxaropenez eta erantzukizun partekatuaz begiratzera gonbidatu zuten.

Ospakizunean zehar, Itaka-Eskolapioen nortasuna eta bokazioa definitzen dituzten hainbat gako nabarmendu ziren. Lehenik eta behin, eskolapio-bizitza sortzen duen sare bat izatearen garrantzia azpimarratu zen, komunitate biziak, irekiak eta entzute-jarreran daudenak sostengatzeko gai den sarea. Era berean, eraldatzaile den eta periferiatan presente dagoen sare izaten jarraitzeko deia jarri zen erdigunean, presentzia hezitzaile, ebanjelizatzaile eta hurbila gehien behar den tokietan. Muga sozial, existentzial eta hezitzaileetan, Itaka-Eskolapioek gehien behar dutenen alboan egoten jarraitu nahi dute, hezkuntzak bizitza baten norabidea alda dezakeela sinetsita.

Topaketa etorkizunari begira amaitu zen, eta Itaka-Eskolapioentzat partekatutako amets batekin: Ebanjelioaren bihotza, kalasantziar misio-ausardia eta uko egin ezin zaion poza dituen sare bat eraikitzen jarraitzea.

25 urte hauek eskertzeko arrazoi dira, baina baita elkarrekin bidean jarraitzeko gonbidapena ere, bizitza, itxaropena eta eraldaketa sortzen dituen misio partekatu bat posible eginez.